ភ្នំពេញ៖ នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានលើកឡើងថារាជរដ្ឋាភិបាលកម្ពុជាបានបង្កើតនូវទីតាំងសុវត្ថិភាពមួយនៅជិតព្រំដែនអេស៊ីប និងហ្សកដានី ដើម្បីឱ្យពលរដ្ឋខ្មែរដែលរស់នៅអ៊ីស្រាអែលដែលមានបំណងចង់ទៅទីតាំងសុវត្ថិភាពដើម្បីស្នាក់នៅជាបណ្ដោះអាសន្ន។
ក្នុងសារសំឡេងពិសេសព្រឹកថ្ងៃទី១៤ ខែតុលា ឆ្នាំ២០២៣ សម្ដេចធិបតី ហ៊ុន ម៉ាណែត បានលើកឡើងថាទីតាំងសុវត្ថិភាពនោះមានចម្ងាយប្រមាណ ៣០០គីឡូម៉ែត្រពីតំបន់កាហ្សា។ សម្ដេចបានបន្ថែមថាប្រសិនបើសិស្សនិស្សិតឬពលរដ្ឋខ្មែរដែលរស់នៅក្នុងទឹកដីអ៉ីស្រាអែល ចង់ទៅស្នាក់នៅទីតាំងសុវត្ថិភាពនោះ អាចចុះឈ្មោះតាមប្រព័ន្ធអនឡាញដែលក្រុមការងារនៃរាជរដ្ឋាភិបាលកម្ពុជាបានទំនាក់ទំនងផ្ដល់ជូនទៅកាន់ពួកគេ។
បើទោះជាយ៉ាងណាបើតាមសម្ដេចធិបតី ពលរដ្ឋភាគច្រើនដែលរស់នៅអ៊ីស្រាអែលសម្រេចមិនទាន់ទៅនោះទេ។
សម្ដេចថា៖ «ជាលទ្ធផលគិតត្រឹមម៉ោង ១០ព្រឹក ថ្ងៃ១៤ ខែតុលា ឆ្នាំ២០២៣ ត្រូវនឹងម៉ោង ៧ព្រឹកនៅប្រទេសអ៊ីស្រាអែលមានបងប្អូននិស្សិតចំនួន ៤២២នាក់បានចុះឈ្មោះតាមប្រព័ន្ធអនឡាញ។ ដោយបងប្អូនទាំង ៤២២នាក់នោះបានសម្រេចចិត្តស្នាក់នៅតំបន់ដែលខ្លួនរស់នៅនិងធ្វើការធម្មតា។ ដោយគិតថាមិនទាន់មានការចាំបាច់សម្រាប់ពួកគេដើម្បីផ្លាស់ប្ដូរទីតាំងទៅកាន់ទីតាំងសុវត្ថិភាពដែលរាជរដ្ឋាភិបាលកម្ពុជាបានរៀបចំជូននោះទេ»។
សម្ដេចធិបតីបានលើកឡើងថា ក្រុមការងាររាជរដ្ឋាភិបាលនៅតែបន្តតាមដានយ៉ាងយកចិត្តទុកដាក់ចំពោះស្ថានភាពនៃសង្គ្រាមអ៉ីស្រាអ៊ែល និងហាម៉ាស់នេះជានិច្ច៕
